Kannast þú við eyrnasuð, oft kallað tinnitus?
Mér fannst mjög merkilegt þegar ég var að skoða einkenni/fylgikvilla breytingaskeiðsins að sjá að eyrnasuð væri þar á lista!
En við erum víst með estrógen viðtaka á nánast öllum frumum líkamans þannig að af hverju ættu eyrun ekki að geta orðið fyrir barðinu á estrógen skorti…
Ég var búin að finna fyrir þessu í nokkuð mörg ár...ætli ég hafi ekki byrjað að finna fyrir þessu uppúr ca. 30-35 ára. Hvort það hafi verið tengt breytingum á hormónum, streitu eða svefnleysi eða kannski blöndu af þessu öllu veit ég ekki.
Ég fann síðan fyrir að þetta versnaði heilmikið í kringum fertugt og var mjög slæmt síðustu 2 árin áður en ég vissi að ég væri komin á breytingaskeiðið. Fann fyrir són og eins og ég væri bara með æðaslátt í eyranu, sérstaklega því vinstra, mest fann ég fyrir þessu þegar ég lagðist á koddann í þögninni að reyna að sofna, þá var þetta alveg að æra mig!
Þetta lagaðist alveg þegar ég byrjaði á hormónameðferð, en ég finn aðeins fyrir þessu þegar streitan tekur yfir…það er þá ágætis áminning um að ég sé komin að mörkunum mínum og kominn tími á að taka góða slökun og huga að streitustjórnun.
Eyrnasuð getur verið erfitt og talið herja á 10-15% fólks. Og hjá 1-2% hefur það veruleg áhrif á líf þeirra. Eyrnasuð getur verið hringjandi hljóð en það getur líka verið suð, humm, púlserandi eða jafnvel hljómað eins og tónlist eða söngur. Það gæti verið bara annað eyrað, eða bæði, og hljóðin geta komið og farið eða verið til staðar allan tímann.
Sumar konur finna að eyrnasuð byrjar eða versnar þegar þær byrja á breytingaskeiðinu eða fara í tíðahvörf.
Eyrnasuð er flókið ástand sem getur versnað af sálrænum atburðum eins og við ýmsar geðraskanir, þunglyndi og streitu. Það er ekki vitað nákvæmlega hvers vegna konur geta fundið fyrir eyrnasuð sem hluta af einkennum breytingaskeiðsins.
Það hafa ekki verið gerðar miklar rannsóknir á heyrn, eyrnasuði, breytingaskeiðinu og hormónauppbótarmeðferð..
Við erum með estrógenviðtaka í frumum eyrnanna og meðfram heyrnarbrautinni, en það er enn ekki ljóst hvaða hlutverki estrógen, testósterón eða prógesterón gegnir nákvæmlega fyrir heyrnina.
Sumar rannsóknir sýna að lágt estrógenmagn getur skert heyrn. Sérfræðingar hafa sett fram tilgátu um að breytingar á blóðflæði til innra eyra (kuðungsins) og breytingar á samsetningu blóðsins hafi áhrif á stjórnun rafefnafræðilegra hvata sem myndast af hárfrumum í kuðungnum, sem breytir hljóðmerkjum.
Heyrnartap getur einnig verið orsök eyrnasuðs, eins og aðrir þættir svo sem Ménière-sjúkdómur eða sjúkdómar eins og sykursýki, skjaldkirtilssjúkdómar, MS eða kvíði eða þunglyndi. Eyrnasuð getur verið aukaverkun sumra krabbameinslyfja, sýklalyfja, bólgueyðandi gigtarlyfja (NSAID) og aspiríns.
Réttur skammtur og tegund hormónauppbótarmeðferðar getur oft bætt eyrnasuð, sem og dregið úr streitu og slakað á. Djúp öndun eða jóga getur hjálpað til við þetta auk þess að tryggja að þú fáir nægan svefn. Það getur oft verið gagnlegt að hlusta á slakandi tónlist eða nota hljóðmeðferð til að hjálpa þér að taka hugann frá suðinu.
Heimildir: Dr. Loiuse Newson - Balance Menopause